മറഡോണ

നവാഗതനായ വിഷ്‍ണു നാരായണൻ സംവിധാനം നിർവഹിച്ചിരിക്കുന്ന ടോവിനോ തോമസ് ചിത്രമായ മറഡോണ ആക്ഷനും നാടകീയതയും ഒത്തുചേരുന്ന ഒരു ത്രില്ലർ മൂവിയാണ്. ദിലീഷ് പോത്തന്‍റെയും ലിജോ ജോസ് പെല്ലിശ്ശേരിയുടെയും സഹസംവിധായകനായി പ്രവർത്തിച്ചിട്ടുള്ള കൃഷ്ണമൂർത്തി ആദ്യമായി രചന നിർവഹിച്ചിരിക്കുന്ന ചിത്രം നിർമ്മിച്ചിരിക്കുന്നത് എസ് വിനോദ്‌കുമാറാണ്.

ടോവിനോ തോമസിനോടൊപ്പം ‘അങ്കമാലി ഡയറീസ്’ ഫെയിം ടിറ്റോ വിൽ‌സൺ സുപ്രധാന വേഷത്തിൽ എത്തുന്ന ചിത്രത്തിൽ ശരണ്യ ആർ നായർ ,ലിയോണ ലിഷോയ് ചെമ്പൻ വിനോദ് എന്നിവരാണ് മറ്റു പ്രധാന വേഷങ്ങളിൽ എത്തുന്നത്.

നാട്ടിലെ ചില സംഭവങ്ങൾക്കുശേഷം ബാംഗ്ലൂരിൽ എത്തുന്ന മറഡോണയെ അവിടെ കാത്തിരുന്നത് കൂടുതൽ അപകടരമായ സാഹചര്യങ്ങൾ ആയിരുന്നു. അതിനു ശേഷം അവിടെ അകന്ന ബന്ധുവിന്‍റെ ഫ്ലാറ്റിൽ അഭയം തേടുന്ന മറഡോണയുടെ ജീവിതത്തിൽ സംഭവിക്കുന്ന മാറ്റങ്ങളാണ് കഥയുടെ ഇതിവൃത്തം.

മറഡോണയുടെ പ്രണയവും സൗഹൃദവും നന്മതിന്മകളുടെ തിരിച്ചറിവിലൂടെയും മുന്നോട്ട് നീങ്ങുന്ന കഥാഗതി തുടക്കത്തിൽ കാണിച്ച ചടുലത അവസാനംവരെ നിലനിർത്തുന്നതിൽ പരാജയപ്പെട്ടു. ചിത്രത്തിന്‍റെ അണിയറപ്രവർത്തകർ നേരത്തെ വ്യക്തമാക്കിയിരുന്നത്‌ പോലെ മറഡോണ എന്ന ഫുട്ബാൾ ഇതിഹാസത്തിന്‍റെ പേരിലെ സാമ്യത അല്ലാതെ ചിത്രത്തിനു ഫുട്ബോളുമായി യാതൊരു ബന്ധവുമില്ല.

ചിത്രത്തിൽ എടുത്തു പറയാവുന്ന ഒന്ന് തുടക്കക്കാരനായ സംവിധായകൻ ആക്ഷൻ രംഗങ്ങൾ ചിത്രീകരിക്കുന്നതിൽ കാണിച്ച കയ്യടക്കവും ടോവിനോ തോമസ് എന്ന നടൻ ഈ രംഗങ്ങളിൽ കാണിച്ച സൂക്ഷ്‍മാഭിനയവുമാണ്. തുടക്കത്തിൽ ഉണ്ടായിരുന്ന കഥയുടെ ഒഴുക്ക് അവസാനം വരെ കാത്തു സൂക്ഷിക്കാൻ കഴിഞ്ഞിരുന്നെങ്കിൽ ടോവിനോയുടെ അഭിനയജീവിതത്തിലെ അവിസ്‍മരണീയ കാഥാപാത്രമായി മറഡോണ മാറിയേനേ.

ദീപക് ഡി മേനോൻ ഛായാഗ്രഹണം നിർവഹിക്കുന്ന ചിത്രത്തിന്‍റെ സംഗീത സംവിധാനം നിർവഹിച്ചിരിക്കുന്നത് സുഷിൻ ശ്യാമാണ്. ഗാനങ്ങളും പശ്ചാത്തല സംഗീതവും മികച്ചതായി. ഏറെ സമയവും ഫ്ലാറ്റിനുള്ളിൽ ചിത്രീകരിച്ചിരിക്കുന്നുവെങ്കിലും പുറത്തു വന്നപ്പോഴൊക്കെ കാമറ ദൃശ്യങ്ങൾ മനോഹരമായിരുന്നു.

ആദ്യ സമയങ്ങളിൽ പിടിതരാതെ മുന്നോട്ട് പോയ കഥ പിന്നീട് ഒരേ ഗതിയിൽ നീങ്ങിയപ്പോള്‍ ഏറെക്കുറെ ഊഹിച്ചെടുക്കാവുന്നതായി. ക്ലൈമാക്സ് പൊടുന്നനെ ആയിരുന്നുവെങ്കിലും അവിടം വരെ വലിച്ചു നീട്ടിയ സിനിമയുടെ രണ്ടാം ഭാഗം പ്രേക്ഷകനിൽ വിരസതയുളവാക്കി.

കഥാപാത്രങ്ങളിൽ പൊടുന്നനെ സംഭവിക്കുന്ന സ്വഭാവമാറ്റം സാധരണ പ്രേക്ഷകനു ദഹിക്കുന്നതായില്ല. ഒരു കൊച്ചു കുഞ്ഞിനെ നിർദയം ഒരു കാരണവുമില്ലാതെ ഉപദ്രവിക്കുന്ന ഒരാൾ ഒരു പക്ഷിക്കുഞ്ഞിനെ രക്ഷിക്കാൻ ജീവൻ പോലും പണയം വെച്ച് ശ്രമിക്കുന്ന രീതിയിലേക്കു പൊടുന്നെനെ മാറുന്നത് എങ്ങിനെയാണെന്നു വിശ്വസിപ്പിക്കാൻ കഥയ്ക്ക് ശക്തിയുണ്ടായില്ല.

തുടക്കക്കാരന്‍റെ പതർച്ചകൾ ഏതുമില്ലാതെ സംവിധാനം ,ടോവിനോ തോമസിന്‍റെയും ടിറ്റോയുടെയും ചെമ്പൻ വിനോദിന്‍റെയും ശരണ്യയുടെയും മികച്ച അഭിനയം,നല്ല പശ്ചാത്തല സംഗീതം ,എല്ലാത്തിനുമപരി ഏറെ പ്രതീക്ഷ നൽകിയുള്ള തുടക്കം. പക്ഷേ, മികച്ച ഒരു സിനിമ എപ്പോഴും തല ഉയർത്തി നില്‍ക്കുന്നത് കഥയുടെ കരുത്തിലും വൈവിധ്യത്തിലും ആണെന്നു മറഡോണ വീണ്ടും ഓർമിപ്പിക്കുന്നു.

മറഡോണ

About The Author
-

You may use these HTML tags and attributes: <a href="" title=""> <abbr title=""> <acronym title=""> <b> <blockquote cite=""> <cite> <code> <del datetime=""> <em> <i> <q cite=""> <s> <strike> <strong>